ស្ទឹងត្រែង៖ រដ្ឋបាលខេត្តស្ទឹងត្រែងបានអំពាវនាវដល់ពលរដ្ឋដែលរស់នៅខ្សែទឹកខាងក្រោមប្រុងប្រយ័ត្នចំពោះទឹកទំនប់វារីអគ្គិសនីសេសានក្រោម២ កំពុងតែហក់ឡើងលើសចំណុចប្រុងប្រយ័ត្នចំនួន ៧៥,២៧ម៉ែត្រនាព្រឹកថ្ងៃទី០១ ខែកញ្ញា ឆ្នាំ២០២៣។

រដ្ឋបាលខេត្តស្ទឹងត្រែងបានប្រាប់ឱ្យដឹងថា ការហក់ឡើងនូវទឹកទំនប់វារីអគ្គិសនីសេសានក្រោម២នេះ ដោយសារតែប៉ុន្មានថ្ងៃមកនេះ មានភ្លៀងធ្លាក់ជោគជាំជាប់ៗគ្នាជាច្រើនថ្ងៃពាសពេញខេត្តស្ទឹងត្រែង និងភ្លៀងធ្លាក់នៅតំបន់ផ្នែកខាងលើៗថែមទៀតផង។

បើតាមរបាយការណ៍របស់មន្ទីរធនធានទឹក និងឧតុនិយមខេត្តស្ទឹងត្រែង ទឹកនៅតាមទន្លេទាំង៤ ក្នុងខេត្តស្ទឹងត្រែងគឺកំពុងតែហក់ឡើង ដែលទាមទារឱ្យមានការប្រុងប្រយ័ត្នទុកជាមុនដើម្បីការពារនូវហន្តរាយផ្សេងៗដែលនឹងកើតឡើងជាយថាហេតុ។

បើតាមសេចក្តីប្រកាសរបស់ក្រសួងធនធានទឹកកាលពីថ្ងៃចន្ទទី២៨ ខែសីហា កម្ពុជាទទួលរងឥទ្ធិពលប្រព័ន្ធសម្ពាធទាបអូសបន្លាយលើភាគខាងជើងប្រទេសថៃ ឡាវ និងវៀតណាម រួមជាមួយនឹងឥទ្ធិពល់ខ្សោយពីព្យុះទីហ្វង ឈ្មោះ «សាវឡា» ស្ថិតនៅខាងកើតនៃភាគខាងជើងប្រទេសហ្វីលីពីន ដែលព្យុះនេះនឹងដើរចូលដល់ភាគអាគ្នេយ៍ប្រទេសចិននៅថ្ងៃទី២ ខែកញ្ញា។

បាតុភូតទំាងនេះហើយធ្វើឱ្យតំបន់ខ្ពង់រាប ទំនាបកណ្តាល និងតំបន់សមុទ្រអាចមានភ្លៀងធ្លាក់ លាយឡំផ្គរ រន្ទះ និងខ្យល់កន្ត្រាក់៕